ಹಾಲಿವುಡ್ ನಟ – ಬ್ಲಾಕ್‌ ಪ್ಯಾಂಥರ್ ಖ್ಯಾತಿಯ ಚ್ಯಾಡ್ವಿಕ್​ ಬೋಸ್​ಮನ್​ ಇನ್ನಿಲ್ಲ

ಹಾಲಿವುಡ್​ನ ಬ್ಲಾಕ್​ ಪ್ಯಾಂಥರ್ ಸಿನಿಮಾದ ಖ್ಯಾತ ನಟ ಚ್ಯಾಡ್ವಿಕ್​ ಬೋಸ್​ಮನ್ ಕ್ಯಾನ್ಸರ್​ ನಿಂದ ಇಂದು ಕೊನೆಯುಸಿರೆಳೆದಿದ್ದಾರೆ.

43 ವರ್ಷದ ಬೋಸ್​ಮನ್ ಕಳೆದ ಕೆಲವು ವರ್ಷಗಳಿಂದ ದೊಡ್ಡ ಕರುಳಿನ ಕ್ಯಾನ್ಸರ್​ ನಿಂದ ಬಳಲುತ್ತಿದ್ದರು ಎಂದು ತಿಳಿದುಬಂದಿದೆ. ಸಾವಿನ ಬಗ್ಗೆ ಕುಟುಂಬಸ್ಥರು ಮಾಹಿತಿಯನ್ನು ಚ್ಯಾಡ್ವಿಕ್​ ಫೇಸ್​ಬುಕ್​ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ.

ಹಲವಾರು ಆಪರೇಷನ್ ಹಾಗೂ ಕೀಮೋಥೆರಪಿ ನಡುವೆಯೇ ದೊಡ್ಡ ದೊಡ್ಡ ಹಾಲಿವುಡ್​ ಸಿನಿಮಾಗಳಲ್ಲಿ ಬೋಸ್​ಮನ್ ನಟಿಸಿದ್ದರು. 2016ರಲ್ಲಿ ಬೋಸ್​ಮನ್ ಅವರಿಗೆ ಸ್ಟೇಜ್​ 3 ಕ್ಯಾನ್ಸರ್​ ಇರೋದು ಪತ್ತೆಯಾಗಿತ್ತು. 4 ವರ್ಷದ ಅವರ ಹೋರಾಟದ ಹೊರತಾಗಿಯೂ ಸ್ಟೇಜ್​​ 4ಗೆ ತಲುಪಿತ್ತು ಎಂದು ತಿಳಿಸಲಾಗಿದೆ.

2018ರಲ್ಲಿ ಬಿಡುಗಡೆಯಾಗಿದ್ದ ಬ್ಲಾಕ್ ಪ್ಯಾಂಥರ್ ಸಿನಿಮಾ ಭರ್ಜರಿ ಹಿಟ್​ ಆಗಿ, ವಿಶ್ವದಾದ್ಯಂತ 1 ಬಿಲಿಯನ್ ಡಾಲರ್(ಸುಮಾರು 7000 ಕೋಟಿ ರೂಪಾಯಿ) ಗಳಿಸಿತ್ತು. ಅಲ್ಲದೆ ಆಸ್ಕರ್​ನಲ್ಲಿ ಅತ್ಯುತ್ತಮ ಚಿತ್ರ ಪ್ರಶಸ್ತಿಗೆ ನಾಮಿನೇಟ್ ಆದ ಮೊದಲ ಕಾಮಿಕ್ ಬುಕ್ ಸಿನಿಮಾ ಎನಿಸಿಕೊಂಡಿತ್ತು. ಬೋಸ್​ಮನ್ ನಿಧನಕ್ಕೆ ಜಗತ್ತಿನಾದ್ಯಂತ ಹಲವು ಗಣ್ಯರು ಹಾಗೂ ಸಿನಿಮಾ ಸ್ಟಾರ್​ಗಳು ಸಂತಾಪ ಸೂಚಿಸಿದ್ದಾರೆ.