ಚಂಡಿಗಢ: ಭಾರತೀಯ ವಾಯುಪಡೆಯ ಮಹಿಳಾ ಯೋಧರಿಂದ ಕೂಡಿದ್ದ ತಂಡ ಎಂಐ-17 ಯುದ್ಧಹೆಲಿಕಾಪ್ಟರ್ನಲ್ಲಿ ಯಶಸ್ವಿಯಾಗಿ ಹಾರಾಟ ಕೈಗೊಂಡು ಹೊಸ ದಾಖಲೆ ನಿರ್ಮಿಸಿದ್ದಾರೆ. ಈ ಮೂಲಕ ವಾಯುಸೇನೆಯ ಹೆಲಿಕಾಪ್ಟರ್ ಒಂದು ಸಂಪುರ್ಣವಾಗಿ ಮಹಿಳೆಯರಿಂದಲೇ ನಿಯಂತ್ರಿಸಲ್ಪಟ್ಟು ಐತಿಹಾಸಿಕ ಸಾಧನೆ ಮಾಡಿದೆ.
ಎಂಐ-17 ವಿ5 ಯುದ್ಧ ಹೆಲಿಕಾಪ್ಟರ್ನಲ್ಲಿ ಮಹಿಳಾ ಪೈಲಟ್ಗಳು ಸೇರಿ ಒಟ್ಟು ಮೂವರು ಮಹಿಳೆಯರು ಹಾರಾಟ ನಡೆಸಿದ್ದಾರೆ. ಕ್ಯಾಪ್ಟನ್, ಫ್ಲೈಟ್ ಲೆಫ್ಟಿನೆಂಟ್ ಪರೂಲ್ ಭಾರಧ್ವಜ್, ಕೋ ಪೈಲಟ್ ಅಮನ್ ನಿಧಿ ಹಾಗೂ ಫ್ಲೈಟ್ ಇಂಜಿನಿಯರ್ ಆಗಿರುವ ಫ್ಲೈಟ್ ಲೆಫ್ಟಿನೆಂಟ್ ಹೀನಾ ಜೈಸ್ವಾಲ್ ಸೇನಾ ಹೆಲಿಕಾಪ್ಟರ್ನಲ್ಲಿ ಹಾರಾಟ ನಡೆಸಿದರು.
ಯುದ್ಧಸನ್ನದ್ಧತೆಯ ತರಬೇತಿ ಕಾರ್ಯಕ್ರಮದಡಿಯಲ್ಲಿ ನೈಋತ್ಯ ವಾಯು ನೆಲೆಯ ನಿರ್ಬಂಧಿತ ಪ್ರದೇಶಗಳಲ್ಲಿ ಹೆಲಿಕಾಪ್ಟರ್ ಅನ್ನು ಇಳಿಸುವುದು ಮತ್ತು ಹಾರಾಟ ಕೈಗೊಳ್ಳುವುದು ಸೇರಿ ಹಲವು ರೀತಿಯ ತರಬೇತಿ ವೇಳೆ ಇವರು ಈ ಹಾರಾಟ ಕೈಗೊಂಡಿದ್ದರು ಎಂದು ಭಾರತೀಯ ವಾಯುಪಡೆ ಮೂಲಗಳು ತಿಳಿಸಿವೆ.
ಪಂಜಾಬ್ನ ಮುಕೇರಿಯನ್ ನಿವಾಸಿಯಾಗಿರುವ ಫ್ಲೈಟ್ ಲೆಫ್ಟಿನೆಂಟ್ ಪಾರುಲ್ ಭಾರಧ್ವಜ್, ಎಂಐ-17 ವಿ5 ಯುದ್ಧಹೆಲಿಕಾಪ್ಟರ್ ಅನ್ನು ಚಾಲನೆ ಮಾಡಿದ ಮೊದಲ ಮಹಿಳಾ ಪೈಲಟ್ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ರಾಂಚಿ ನಿವಾಸಿ ಫ್ಲೈಯಿಂಗ್ ಆಫೀಸರ್ ನಿಧಿ ಜಾರ್ಖಂಡ್ನ ಮೊದಲ ಐಎಎಫ್ ಪೈಲಟ್ ಎಂಬ ಹೆಗ್ಗಳಿಕೆ ಹೊಂದಿದ್ದರೆ, ಫ್ಲೈಯಿಂಗ್ ಆಫೀಸರ್ ಜೈಸ್ವಾಲ್ ಚಂಡಿಗಢ ನಿವಾಸಿಯಾಗಿದ್ದು ಭಾರತೀಯ ವಾಯುಪಡೆಯ ಮೊದಲ ಮಹಿಳಾ ಫ್ಲೈಟ್ ಇಂಜಿನಿಯರ್ ಎಂಬ ಶ್ರೇಯ ಹೊಂದಿದ್ದಾರೆ.
You must be logged in to post a comment.