ವಿದ್ಯಾರ್ಥಿಗಳೇ ತಯಾರಿಸಿದ ಉಪಗ್ರವನ್ನು ಯಶಸ್ವಿಯಾಗಿ ಕಕ್ಷೆಗೆ ಸೇರಿಸಿದ ಇಸ್ರೋ..!

ನವದೆಹಲಿ: ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ – ಇಸ್ರೋ ಇಂದು ‘ಕಲಾಂಸ್ಯಾಟ್ ವಿ2’​ ಮತ್ತು ‘ಮೈಕ್ರೋ ಸ್ಯಾಟ್​-ಆರ್’ ಎಂಬ​ ಎರಡು ಉಪಗ್ರಗಳನ್ನು ಯಶಸ್ವಿಯಾಗಿ ಕಕ್ಷೆಗೆ ಸೇರಿಸಿದೆ.

ಶ್ರೀಹರಿಕೋಟಾದ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಿಂದ ಪಿಎಸ್‍ಎಲ್‍ವಿ-ಸಿ44 ರಾಕೆಟ್ ಮೂಲಕ ಕಲಾಂಸ್ಯಾಟ್ ವಿದ್ಯಾರ್ಥಿ ಉಪಗ್ರಹ ಹಾಗೂ ಮೈಕ್ರೋಸ್ಯಾಟ್-ಆರ್ ಉಪಗ್ರಹವನ್ನು ಯಶಸ್ವಿಯಾಗಿ ಉಡಾಯಿಸಿದೆ.

ಸುಮಾರು 44.4 ಮೀಟರ್​ ಉದ್ದದ 260 ಟನ್​ ತೂಕದ ಪಿಎಸ್​ಎಲ್​ವಿ ಉಡಾವಣಾ ವಾಹಕವು ಈ ಎರಡೂ ಉಪಗ್ರಹಗಳನ್ನು ಕಕ್ಷೆಗೆ ಸೇರಿಸುವಲ್ಲಿ ಯಶಸ್ವಿಯಾಯಿತು. ‘ಕಲಾಂ-ಸ್ಯಾಟ್’​ ಅನ್ನು ವಿದ್ಯಾರ್ಥಿಗಳೇ ಸೇರಿ ತಯಾರಿಸಿರುವುದು ವಿಶೇಷ. ಇದರ ಜತೆಗೆ ಸೇನಾ ಸಂಶೋಧನೆಗಾಗಿ ತಯಾರಿಸಲಾದ ‘ಮೈಕ್ರೋ ಸ್ಯಾಟ್​-ಆರ್​’ ಅನ್ನು ಕಕ್ಷೆಗೆ ಸೇರಿಸಲಾಯಿತು.

ಕಲಾಂ ಸ್ಯಾಟ್​ ಜಗತ್ತಿನ ಅತ್ಯಂತ ಹಗುರ ಉಪಗ್ರಹವೆನಿಸಿದ್ದು, ಅದನ್ನು ಚೆನ್ನೈನ ‘ಸ್ಪೇಸ್​ ಕಿಡ್ಸ್​ ಇಂಡಿಯಾ’ ಎಂಬ ಸಂಸ್ಥೆಯ ವಿದ್ಯಾರ್ಥಿಗಳು ತಯಾರಿಸಿದ್ದಾರೆ. ಅದರ ಒಟ್ಟಾರೆ ತೂಕ ಕೇವಲ 1.26 ಕೆ.ಜಿ ಮಾತ್ರ.

ಕೇವಲ 12 ಲಕ್ಷ ರೂಪಾಯಿಗಳ ವೆಚ್ಚದಲ್ಲಿ, ಆರೇ ದಿನಗಳಲ್ಲಿ ತಯಾರಿಸಲಾಗಿರುವ ಈ ಉಪಗ್ರಹವನ್ನು ಇಸ್ರೋ ಒಂದೇ ಒಂದು ರೂಪಾಯಿಯನ್ನೂ ಪಡೆಯದೆ ಕಕ್ಷೆಗೆ ಸೇರಿಸಿತು. ಕಲಾಂ ಸ್ಯಾಟ್​ 6 ದಿನಗಳಲ್ಲಿ ತಯಾರಾಗಿತ್ತಾದರೂ, ಅದರ ತಂತ್ರಜ್ಞಾನ ಅಭಿವೃದ್ಧಿಪಡಿಸಲು 6 ವರ್ಷಗಳ ಅಧ್ಯಯನ ನಡೆದಿತ್ತು ಎಂದು 20 ವಿದ್ಯಾರ್ಥಿಗಳ ತಂಡವನ್ನು ಮುನ್ನಡೆಸಿದ್ದ ‘ಸ್ಪೇಸ್​ ಕಿಡ್ಸ್​ ಇಂಡಿಯಾ’ ಸಂಸ್ಥೆಯ ಮುಖ್ಯಸ್ಥರಾದ ಶ್ರೀಮತಿ ಕೇಶನ್​ ತಿಳಿಸಿದ್ದಾರೆ.